പ്രവാസി

വ്യഥയാൽ കണ്ഠമിടറുന്നതിനിടയിലും ചുണ്ടിലായ് മന്ദഹാസം നിറച്ചു യാത്ര പറഞ്ഞിറങ്ങിയവൻ.. നൽപാതി തന്നുടെ പതം പറച്ചിലുകൾക്ക് .. നറു ചുംബനത്താലേകി മറുപടി... ഇനിയൊന്ന് വിശ്രമിച്ചുകൂടെയെൻ മകനേ.. നിനക്കെന്നാരാഞ്ഞു വിതുമ്പുമെൻ വാത്സല്യ മാതൃഹൃദയത്തോടെന്ത് പറയാൻ.. ഒരാലിഗനത്താലെല്ലാം പറഞ്ഞ പിതാവിന്റെ സ്നേഹമെന്തെന്നു തിരിച്ചറിവൂ ഞാനുമിന്ന്. പിതൃത്വമെന്ന കരുതലിന്റാഴപരപ്പുകൾ ... മാതൃത്വത്തിന്റെ തീരാമഹത്വവും , പ്രിയ പത്നി തന്ന സ്നേഹവും കടപ്പെട്ടാണ് യാത്ര. കൺകുളിർകെ കാണാനാവാതെ കണ്ണുകൾ വ്യഥയാൽ തേടുവതിനിയുമവന്റെയാ പൊന്നുമക്കളെ തന്നെ.... ജന്മം തന്ന കുളിരേകുമീ നാടുവിട്ട് അന്നം തരുന്ന നാട്ടിലെ പൊള്ളുന്ന ചൂടിലേക്കും ... കടപ്പാടുകളുടെ തീരാച്ചുഴിയിലേക്കും.. പ്രവാസിയെന്ന യോദ്ധാക്കൾ ഇനിയും കച്ചമുറുക്കും.. കൈ നിറയെ സമ്മാനങ്ങളുമായ് .. ശുഷ്കമായ നാളേക്കൊരതിഥിയായി ഇനിയുമവനെ നിങ്ങൾക്ക് തിരികെ ലഭിക്കുമോ..? അതോ പാതിവഴിയിൽ നിലച്ചുപോയ ഒരു താളമായ് മറവിയിലാണ്ടു പോകുമോ...?